Luk 1 | MPX | STEP | Ateu owa Tiyopilo. Valila gamagalau hi gewi bugul bolo hi masal gamameya wasana iyaka hi leli,

1 Ateu owa Tiyopilo. Valila gamagalau hi gewi bugul bolo hi masal gamameya wasana iyaka hi leli, ^a 2 hi golugoluwa bolo hi kiteya mataliyaa wali wasa elana. Heliya hi kiteya mataliyaa i telipunaa ana abatelipuna elana, ge heliya hi ola Yehoba wana baaba ana totuwalali inoke wasa o hi baunan eliyama. 3 He nau bugul bolo ona o ya asimuli-an bubun, ya telipunaa ana abatelipuna elana, inoke ya nuwatu te wasaliya na vatal bubun ge na leli lowan owa gamagal bwabwatana Tiyopilo kaiwem. 4 Inoke nu atena te toto hi panpankiti-an eliyam i tunahot.

Anelose I Pamasal Sakalaiya elana Abwe Elisabet Diyon Tobabitaiso Ni Ab

5 Helodi Yudiya wali kin wana sauga logugui, he topowon etegana iyoho alana Sakalaiya, iya Abaidiya wana boda ana gamagal etega. Lagona alana Elisabet, iya al topowon houhouwena Eloni tubutubunina etega. 6 Ali toto eluwa wali minamina i waisi Yehoba matanaa, he Yehoba wana logugui ge wana baaba gegewena hi henapuan bubun. 7 Nige natuliya i gagan, kaiwena Elisabet i kobwas. He alona ge lagona Sakalaiya iyaka hi liki.

8 Sauga etegana Sakalaiya wana boda wali sauga tuwalali, he Sakalaiya iya iyoho topowon wali tuwalali i awaawaginol Yehoba matanaa. 9 Yaka pat hi galavenu-an i ola topowon ali logugui, ge gamagal etega nihi hile ni ulutuk Yehoba wana Limi Bwabwalena gamwanaa ge bugul bwalena waiwaisana ni ton ana abatonton pwatanaa. Hi pwawa Sakalaiya te ni ginol, inoke i ulutuk Limi Bwabwalena gamwanaa. ^b 10 He bugul bwalena waiwaisana ana sauga tonton elana, gamagalau boda bwabwatana heliya iyoho tola hi awaawanun.

11 Inoke Babala wana anelose etega i masal Sakalaiya elana i talmilila abatonton labena awonaa. 12 Sauga Sakalaiya anelose i kite, inoke atena i you ge i lovakun. 13 Yaa anelose i baek elana i ba, “Sakalaiya, bahi lovakun! Wam awanun iyaka Yehoba i hago. He lagom Elisabet natum melutauina ni ab, inoke alana nu tun Diyon. 14 Iya nuwam ni pwawaisi ge ni payaliyaya-agiwa, ge gamagalau nihi gewi nihi yaliyaya wana masal kaiwena, 15 kaiwena iya alana ni bwata Babala matanaa. Bahi oine ge wewel gasigasisena ni iim. He sauga hinana abwe ni ab ya te Yayaluwa Bwabwalena ni kalaopopwi. ^c 16 Iya boda Isileli nihi gewi ni ahel pasikalil nihi nem Babala eliyana, heliya wali Yabowaine. 17 Wana pagan ge wana gasisi ni ola palopita Ilaitiya, ge iya ni nohouwa Babala awonaa. Iya tamataman aloliyau ge natuliyau ni ahel maniniliya ni abubun, ge bolo Yehoba hi awatautau-an ni ahel pasikalil nuwatu waiwaisana nihi ahe ni ola bolo tosasapol wali nuwatu. He gamagalau ni lovivina-agil Babala wana nem kaiwena.” ^d

18 Inoke Sakalaiya i baek anelose elana i ba, “Ga na ola ge na atena wam baaba i tunahot? Kaiwena nau iyaka ya liki, ge lagou al iyaka i liki.”

19 Anelose Sakalaiya anana i lahe i ba, “Nau Gabeliyel, sauga gegewena ya talmilila Yehoba manininaa, iya i patunau ya nem na liwaliwan eliyam ge wasa waiwaisana ya na wasaan eliyam. ^e 20 He nige no baaba u aabulilek-an, inoke nu talpwakum ge nige bosowaina nu baaba ana siga bugul bolo ya nihi masal. He sauga toto Yehoba i hile eliyana te no baaba ni tunahot.”

21 Sauga o elana gamagalau heliya iyoho hi matamatan Sakalaiya kaiwena, ge hi nuwa gewagewa ga i ola ge i minabi Limi Bwabwalena gamwanaa. 22 Sauga i tagil nige bosowaina ni baaba elal, nimana ya te i papatuwalali, inoke gamagalau hi atena te pankite etega i masal elana Limi Bwabwalena gamwanaa.

23 Sakalaiya wana sauga tuwalali i mowasi, inoke abwe i sikal i na wana panuwaa. 24 Wana sikal enaa, inoke lagona Elisabet i liyan. He weikena nimala panuna nige i nonomasamasal, i miminaa ya te limiya. 25 Inoke Elisabet i ba, “Babala i atilomwan-agau, yaka bugul ya i ginol kaiweu ge o puluwawi i ahek yoho gamagalau mataliyaa.”

Anelose I Pamasal Meli elana Iya Yeisu Ni Ab

26 Elisabet wana liyan ana weikena sikisina gamwanaa, Yehoba anelose Gabeliyel i patuna i na labi Galili panuwana alana Nasaleta, 27 gamaina matabubuwa etega elana. Iya alona ge tau etega alana Yosepa, iya Deibid tubutubunina, hi kawakawalolu. Gamaina matabubuwa o alana Meli. ^f 28 Anelose i na elana ge i ba, “Ateu owa Meli. Babala i minaa eliyam ge iyaka i muloluagiwa.”

29 Meli anelose wana baaba o i hago, yaka atena i bwanabwana nabi inoke i nuwatu loyaloya ge i ba, “Ba mulolu ya ana sapu ga i ola?” 30 Yaa anelose i baek elana i ba, “Meli, bahi lovakun. Yehoba iyaka i muloluagiwa. 31 He abwe nu liyan ge wawaya melutauina nu ab, yaka alana nu tun Yeisu. ^g 32 Iya ni tobwabwatana gamagalau mataliyaa, ge nihi awa Tomihahaina Hot Natuna-an. Tubuna Deibid wana abalogugui Yehoba Yabowaine ni pek elana, ^h 33 ge iya ni tabwa Yakobo tubutubunau wali kin mihomihotina. Wana abalogugui nige ni momowasi.”

34 Inoke Meli i nel anelose elana i ba, “Ga ni masal ola? Kaiwena nau nigeya ga sauga etega alou tau etega ha kekenu.”

35 Anana anelose i lahe i ba, “Yayaluwa Bwabwalena ni lau eliyam, ge Tomihahaina Hot wana gasisi ni yabomwiwa. Inoke wawaya toto abwe nu ab ni bwabwalena ge nihi awa Yehoba Natuna-an. 36 U kite, tutum Elisabet valila gamagalau hi awa kobwakobwasi ge bwagana iyaka i liki, he iyaka i liyan ge wana weikena sikisina te. 37 Nige bugul etega i pupulowan tage Yehoba nige bosowaina ni ginol.” ⁱ

38 Yaka Meli anelose anana i lahe i ba, “Nau Babala wana totuwalali loloyowanina. He ni masal eliyau ni ola toto u baunan.” Inoke anelose Meli i eguluwan.

Meli I Na Elisabet I Kite

39 Sauga toto o elana, Meli i lut ge etimwawa i egon, i na Yudiya awanina etega, iyoho labi oyana gaganina elana. 40 Sauga i vin, yaka i na i ulutuk Sakalaiya wana limiya ge i pata ateu owa Elisabet elana. 41 Sauga Meli wana pata ateu owa Elisabet i hago, inoke wawaya i lamwalamwaniu tinenaa. Elisabet Yayaluwa Bwabwalena i kalaopopwi, 42 inoke i baaba anana i bwata i ba, “Yehoba iyaka i muloluagiwa, am mulolu yowau gegewel ali mulolu i bwata lake. Ge wawaya toto abwe nu ab Yehoba i muloluan al. 43 Ga i ola ge owa no Babala hinana o awatauwan bwabwatana u ginol ge u nem u kiteyau? 44 Sauga wam pata ateu owa ya hago i tuk tanawa, inoke wawaya i yaliyaya ge i lamwalamwaniu tinewa. 45 Yehoba i muloluagiwa, kaiwena u abulilek te Babala ni ginol ni ola wana baaba eliyam.”

Meli Yehoba I Tobalan

46 Inoke Meli i ba:

Atewa Babala ya tobalan, ^j
47 ge yayaluwau i yaliyaya
Yehoba no Topwamwal elana.
48 Ya tobalan kaiwena bwagana nau wana totuwalali nige
no waisi i gagan, iya i atilomwan-agau.
He sauga ya ge sauga i nenem heyan ge heyan
nihi baaba kaiweu nihi ba, “Yehoba i muloluan.”
49 Ya tobalan kaiwena Yehoba
Togasisi bugul bwabwatal i ginolil kaiweu.
He iya i bwabwalena.
50 Heyan ge heyan elal, bolo hi awatauwan wana atilomwan i gangan elal. ^k
51 Nimana elana ginol bwabwatal i ginolil,
ge bolo totoliya hi teli heyagil ge hi nuwatu
tage alaliya i bwata, wali boda i tagalekaleka-an. ^l
52 Tologugui bwabwatal i ahek
yohil abaliyaa ge i teli lowagil,
inoke bolo nige alaliya i gagan i teli heyagil. ^m
53 Bugul waiwaisal i guyauan
togalebu elal hi kalaopopwi,
yaa togogomwau i patuna
yohil nimaliya enoenovana ya. ⁿ
54 Wana totuwalali boda Isileli i label,
ge nige i nunuluwan te ni atilomwan-agil, ^o
55 ni ola wana bateli tubulau elal,
ni ola wana bateli Abalahama ge
tubutubunau heyan ge heyan elal. ^p
56 He Meli i miminaa ga to Elisabet eliyana sauga ana yapu i ola weikena eton, yaka abwe i sikal i na wana awana.

Diyon Tobabitaiso wana Masal Wasana

57 Elisabet wana ab ana sauga i pwawa, inoke i ab natuna melutauina. 58 Wana heliyamwau ge tutunau wasa hi hago te Babala Elisabet i muloluan nabiyan, inoke avaliya hi yaliyaya toyawa.

59 Wawaya wana lan eit ^{▼▼1:59Yudiya wali pagan i ola hiwe. Ebo natuliya melutau nihi ab ge wana lan eit ni pwawa, inoke tuwana buhuna kunisina nihi gotomwa yoho ge alana nihi tun. Pagan o ana logugui i neem Abatelipuna 17:12 elana.} i pwawa inoke hi nowanik ge ana gotomwa yoho paganina nihi ginol. Tage tamana Sakalaiya alana nihi tun pwatanek elana, ^r 60 yaa hinana i ba, “Bahiwa! Alana nuku tun Diyon.”

61 Yaka hi baek elana hi ba, “Tutumiyau gamwaliyaa, nige etega alana i oola to.”

62 Inoke nimaliya hi patuwalali ge eliyana tamana hi neli nuwana hauna alan ni tun wawaya elana. 63 Sakalaiya abaleleli etega i awanuni elal, inoke i leli i ba, “Iya alana Diyon.” Inoke gegewel ateliya i you. 64 Sauga o elana Sakalaiya awana i mwapwela ge bosowaina ni baaba, yaka i telipuna i baaba ge Yehoba i tobatobal-an. 65 He wali heliyamwau gegewel bugul o hi kite inoke hi lovakun nabi. Yaka bugul ya gegewel wasaliya i lelu i na panuwa gegewel elal bolo hi minaa Yudiya labi oya gaganina elana. 66 Gamagalau gegewel bolo wasana hi hago hi nuwanuwatu-an ge hi nel hi ba, “Wawaya ya bwaliga ni tabwa hauna kaba gamagal?” Kaiwena hi atena te Babala i matahikan ge i labe.

Sakalaiya Yehoba I Tobalan

67 Diyon tamana Sakalaiya Yayaluwa Bwabwalena i kalaopopwi inoke i palopisai Yehoba wana baaba i baunan i ba:

68 Babala ta tobalan, iya Isileli wala Yabowaine,
iya i nem kila wana
gamagalau ni labela ge ni sokalila. ^s
69 Wana totuwalali Deibid tubutubunau gamwaliyaa,
Topwamwal gasigasisena etega i pamilil kaiwela, ^t
70 i ola houhouwena wana
bateli palopitau bwabwalel hi baunan.
71 Topwamwal o iya ni pwamwalila ala
topihigelgel ge bolo nige hi nunuwana-agila elal. ^u
72 Inoke tubulau i atilomwan-agil,
ge wana bateli toto iya
totona i ginol i nuwahikan. ^v
73 He iya i ba papasila tubula Abalahama elana, ^w
74 i bateli te ni pwamwalila ala topihigelgel nimaliyaa,
yaka nige ta lolovakun, yaa yawalila miminana
ta tapwatapwalolo eliyana,
ge wala pagan ni sapu ge ni waisi matanaa. ^x
76 He owa natu, abwe gamagalau nihi ba owa
Tomihahaina Hot wana palopita etega,
kaiwena nu nohouwa Babala awonaa ge
kamwasa nu lovivina-an iya kaiwena. ^y
77 He nasi wana gamagalau nu pankitel
wala Yabowaine atilomwan i
kalaopopwi ge wana pagan i meimei,
inoke nuwana wali gegi ni
nuwayoho ge pwamwal nihi pwawa.
Iya sabwelu mwananalina ni patunem labulabumwa, ^z
79 inoke bolo hi minaa gogouwa ge yaomal ligumwina elana ni yanel,
ge ni nulila mibubun ana
kamwasa elana ta nanawa.
80 Wawaya i bwabwata nawa ge yayaluwana al i mamatuwa nawa. Inoke i na i miminek uleya labi kekevana elana ana siga lan toto wana tuwalali i telipuna-an boda Isileli mataliyaa.